खेड एमआयडीसीतील समस्यांवर संतापाचा उद्रेक; वारकरी-धारकरी एकत्र
खेड एमआयडीसीतील समस्यांवर संतापाचा उद्रेक; वारकरी-धारकरी एकत्र
खेड तालुका : खेड तालुक्यातील एमआयडीसी परिसरातील प्रलंबित प्रश्नांवरून आता वारकरी आणि धारकरी वर्ग एकवटला असून, प्रशासनाच्या विरोधात तीव्र आंदोलनाचा इशारा देण्यात आला आहे. गणेश बोत्रे यांनी सुरू केलेल्या साखळी उपोषणाला विविध संघटनांनी पाठिंबा दिला असून, प्रश्नांची तातडीने सोडवणूक न झाल्यास मोठ्या आंदोलनाचा निर्धार व्यक्त करण्यात आला आहे.
ग्रामपंचायत कराचा मुद्दा ऐरणीवर
आंदोलनाचे नेतृत्व करणारे गणेश बोत्रे यांनी ग्रामपंचायतीचा कर एमआयडीसीकडे प्रलंबित असल्याचा आरोप केला आहे. एमआयडीसीकडे जमा झालेला कर नेमका कुठे गेला, असा सवाल त्यांनी उपस्थित केला. हा प्रश्न केवळ एका व्यक्ती किंवा गटापुरता मर्यादित नसून, परिसरातील नागरिकांच्या मूलभूत सुविधा आणि उपजीविकेशी संबंधित असल्याचे त्यांनी सांगितले.
“आम्हाला केवळ घोषणा नकोत, तर प्रश्नांवर ठोस उपाययोजना हव्यात,” अशी भूमिका बोत्रे यांनी मांडली.
उद्योग टिकवण्यासाठी पायाभूत सुविधा द्या
या आंदोलनाला एमआयडीसीतील प्रमुख ट्रान्सपोर्ट व्यावसायिक तसेच माजी सभापती दत्ता भेगडे यांनी पाठिंबा दर्शवला. एमआयडीसीमुळे हजारो नागरिकांच्या रोजगाराचा प्रश्न जोडलेला आहे. कंपन्यांना आवश्यक पायाभूत सुविधा मिळाल्या नाहीत आणि उद्योग परिसरातून बाहेर गेले, तर त्याचा थेट परिणाम कामगार, व्यावसायिक आणि स्थानिक नागरिकांच्या उपजीविकेवर होईल, अशी चिंता त्यांनी व्यक्त केली.
शासनाने उद्योगांना सुरक्षित आणि सक्षम वातावरण उपलब्ध करून देण्यासाठी रस्ते, वाहतूक व्यवस्था आणि इतर मूलभूत सुविधा तातडीने सुधाराव्यात, अशी मागणीही त्यांनी केली.
वाहतूक कोंडीमुळे चार तासांचा प्रवास
एमआयडीसी परिसरातील वाहतूक कोंडीच्या प्रश्नाकडे संतोष महाराज काळोखे यांनी लक्ष वेधले. अनेक वर्षांपासून परिसरातील रस्त्यांची परिस्थिती आणि वाढती वाहतूक पाहत असून, त्यामानाने रस्ते आणि वाहतूक व्यवस्थेत आवश्यक सुधारणा झाल्या नसल्याची नाराजी त्यांनी व्यक्त केली.
पूर्वी सायकलने एका तासात पूर्ण होणारा प्रवास आता वाहनाने करण्यासाठी तब्बल चार तास लागतात. ही प्रगती आहे की अधोगती, असा सवाल त्यांनी उपस्थित केला.
“प्रशासनाने या प्रश्नांची दखल घेतली नाही, तर आम्ही देखील रस्त्यावर उतरणार. वारकरी आणि धारकरी एकत्र येऊन तीव्र आंदोलन करतील,” असा इशारा संतोष महाराज काळोखे यांनी दिला.
विविध संघटनांचा आंदोलनाला पाठिंबा
या आंदोलनाला खेड तालुक्यातील विविध ग्रामपंचायती, ट्रान्सपोर्ट व्यावसायिक, बस असोसिएशन, बाजार समिती संचालक, खरेदी-विक्री संघ, पोलीस पाटील संघटना, विविध वारकरी संघटना, मावळ पंचायत समिती सदस्य, खेड तालुका वकील संघटना, सायली फॅसिलीटीज यांसह विविध संस्था आणि पदाधिकाऱ्यांनी पाठिंबा दर्शवला आहे.
विविध संघटना आणि व्यावसायिक मोठ्या संख्येने आंदोलनाच्या समर्थनार्थ पुढे आल्याने हे आंदोलन अधिक व्यापक होण्याची शक्यता निर्माण झाली आहे. त्यामुळे प्रशासन या प्रश्नांकडे आता गांभीर्याने पाहणार का आणि एमआयडीसी परिसरातील प्रलंबित समस्यांवर ठोस निर्णय घेणार का, याकडे नागरिकांचे लक्ष लागले आहे.
