पोर्शे अपघात प्रकरणात डॉ. अजय तावरेला सुप्रीम कोर्टाचा दिलासा; सशर्त जामीन मंजूर
पोर्शे अपघात प्रकरणात डॉ. अजय तावरेला सुप्रीम कोर्टाचा दिलासा; सशर्त जामीन मंजूर
पुणे | प्रतिनिधी
देशभरात चर्चेत राहिलेल्या पुण्यातील कल्याणीनगर पोर्शे अपघात प्रकरणात महत्त्वाची घडामोड झाली आहे. या प्रकरणात रक्ताचे नमुने बदलल्याच्या आरोपाखाली अटक करण्यात आलेले ससून रुग्णालयाचे माजी फॉरेन्सिक विभागप्रमुख डॉ. अजय तावरे यांना सर्वोच्च न्यायालयाने सशर्त जामीन मंजूर केला आहे.
सर्वोच्च न्यायालयातील न्यायमूर्ती बी. व्ही. नागरत्ना आणि न्यायमूर्ती उज्जल भुयान यांच्या खंडपीठाने हा निर्णय दिला. यापूर्वी मुंबई उच्च न्यायालयाने त्यांचा जामीन अर्ज फेटाळला होता. त्यानंतर डॉ. तावरे यांनी सर्वोच्च न्यायालयात धाव घेत जामिनासाठी याचिका दाखल केली होती.
१९ मे २०२४ रोजी पुण्यातील कल्याणीनगर परिसरात अल्पवयीन मुलाने चालवलेल्या पोर्शे कारने दुचाकीला जोरदार धडक दिल्याने दोन तरुण आयटी अभियंत्यांचा दुर्दैवी मृत्यू झाला होता. या घटनेनंतर देशभरात संतापाची लाट उसळली होती आणि प्रकरणाची व्यापक चर्चा झाली होती.
अपघातानंतर अल्पवयीन आरोपीला वाचवण्यासाठी रक्तातील अल्कोहोल तपासणीचे नमुने बदलल्याचा गंभीर आरोप करण्यात आला होता. या प्रकरणात डॉ. अजय तावरे यांच्यासह काही वैद्यकीय कर्मचाऱ्यांचा सहभाग असल्याचा संशय तपासात समोर आला होता.
दरम्यान, सर्वोच्च न्यायालयाने जामीन मंजूर करताना काही अटी घातल्या असून तपासात पूर्ण सहकार्य करणे तसेच पुराव्यांमध्ये कोणताही हस्तक्षेप न करण्याचे निर्देश दिले आहेत. या निर्णयामुळे चर्चेत असलेल्या पोर्शे अपघात प्रकरणाला नवे वळण मिळाले आहे.
(वंदे भारत न्यूज एक्सप्रेस) 📰
