महापालिकेच्या सत्ताकेंद्राची घडी २० फेब्रुवारीला बसणार; स्थायी समितीसह सर्व विषय समित्यांची निवड
महापालिकेच्या सत्ताकेंद्राची घडी २० फेब्रुवारीला बसणार; स्थायी समितीसह सर्व विषय समित्यांची निवड
वंदे भारत न्यूज नेटवर्क
पिंपरी-चिंचवड :
पिंपरी-चिंचवड महापालिकेतील सत्तासमीकरणांना दिशा देणारी महत्त्वाची सर्वसाधारण सभा शुक्रवार, दि. २० फेब्रुवारी रोजी पार पडणार आहे. या सभेत स्थायी समितीसह महापालिकेच्या विविध विषय समित्यांची रचना होणार असून, त्यामुळे आगामी काळातील प्रशासकीय निर्णयप्रक्रियेवर कोणाचा प्रभाव राहणार, हे स्पष्ट होणार आहे.
उपमुख्यमंत्री अजित पवार यांच्या निधनामुळे शोककाळात स्थगित करण्यात आलेली महापालिकेची पहिली सर्वसाधारण सभा आता होणार असून, या सभेकडे सत्ताधारी व विरोधक दोघांचेही लक्ष लागले आहे. कारण स्थायी समिती ही महापालिकेची ‘पॉवर कमिटी’ मानली जाते.
स्थायी समिती म्हणजे सत्तेची चावी
महापालिकेच्या आर्थिक व्यवहारांपासून ते कोट्यवधी रुपयांच्या विकासकामांपर्यंतचे अंतिम निर्णय स्थायी समितीमार्फत घेतले जातात. कंत्राटे, खर्चास मंजुरी, धोरणात्मक निर्णय यावर स्थायी समितीचा थेट प्रभाव असतो. त्यामुळे या समितीवरील सदस्य निवड राजकीयदृष्ट्या अत्यंत महत्त्वाची मानली जाते.
विविध विषय समित्यांचाही समावेश
या सभेत शिक्षण, महिला व बालकल्याण, बांधकाम, क्रीडा, विधी आदी विषय समित्यांवरही सदस्यांची निवड केली जाणार आहे. या समित्यांमधून शहरातील शिक्षणव्यवस्था, सामाजिक उपक्रम, पायाभूत सुविधा आणि कायदेशीर बाबींवर निर्णय घेतले जातात.
राजकीय हालचालींना वेग
समिती सदस्य निवडीमुळे सत्ताधारी आणि विरोधी गटांमध्ये रस्सीखेच होण्याची चिन्हे दिसत असून, अंतर्गत राजकीय हालचालींना वेग आला आहे. स्थायी समितीतील सदस्यपद मिळवण्यासाठी इच्छुक नगरसेवकांमध्ये जोरदार लॉबिंग सुरू असल्याची चर्चा आहे.
शहराच्या विकासाचा मार्ग ठरणार
२० फेब्रुवारीला होणाऱ्या या सभेमुळे महापालिकेतील निर्णयप्रक्रिया पुन्हा पूर्ण क्षमतेने सुरू होणार असून, रखडलेली विकासकामे मार्गी लागण्याची शक्यता आहे. त्यामुळे या सभेकडे केवळ राजकीय नव्हे, तर नागरिकांच्याही अपेक्षांनी पाहिले जात आहे.
