रुपीनगरमध्ये श्री गणेश मित्र मंडळाच्या वतीने पारंपरिक होळी दहन उत्साहात संपन्न
रुपीनगरमध्ये श्री गणेश मित्र मंडळाच्या वतीने पारंपरिक होळी दहन उत्साहात संपन्न
रुपीनगर: परिसरात श्री गणेश मित्र मंडळ यांच्या वतीने पारंपरिक पद्धतीने होळी दहनाचा कार्यक्रम मोठ्या उत्साहात आणि भक्तीमय वातावरणात पार पडला. हिंदू संस्कृतीतील परंपरा जपत विधीवत पूजन करून होळी प्रज्वलित करण्यात आली. यावेळी परिसरातील नागरिक, महिला व युवक मोठ्या संख्येने उपस्थित होते.
होळी दहनापूर्वी विधीनुसार पूजा करण्यात आली. परिसरातील ज्येष्ठ नागरिकांच्या हस्ते होळीचे पूजन करून दहन करण्यात आले. वाईट प्रवृत्तींचा नाश होऊन समाजात सद्भावना, एकोपा आणि शांतता नांदो, या भावनेतून सर्वांनी प्रार्थना केली. होळीच्या ज्वाळांमध्ये अहंकार, मत्सर आणि द्वेष या नकारात्मक भावना जाळून टाकण्याचा संदेश यावेळी देण्यात आला.
याप्रसंगी सरस्वती हाऊस सोसायटीतील महिलांनी पारंपरिक पद्धतीने पुरणपोळीचा नैवेद्य अर्पण करून होळीचे दर्शन घेतले. महिलांनी पारंपरिक वेशभूषेत सहभाग नोंदवत सणाचा आनंद द्विगुणित केला. लहान मुलांनीही उत्साहाने सहभाग घेत पारंपरिक संस्कृतीची ओळख जपली.
या होलिका उत्सवाचे नियोजन व आयोजन श्री गणेश मित्र मंडळाच्या पदाधिकारी व कार्यकर्त्यांनी केले होते. कार्यक्रम सुरळीत आणि शिस्तबद्ध पार पडण्यासाठी मंडळाच्या सदस्यांनी विशेष परिश्रम घेतले. होळीच्या निमित्ताने समाजातील ऐक्य, बंधुभाव आणि संस्कृतीची जपणूक करण्याचा संदेश देण्यात आला.
या पारंपरिक होळी दहन सोहळ्यामुळे रुपीनगर परिसरात आनंद, उत्साह आणि सामाजिक एकात्मतेचे वातावरण निर्माण झाले.
