अवैध गुटखा विक्रेत्यांचे धाबे दणाणले; तुकाराम मुंढे अन्न व औषध प्रशासन विभागाच्या आयुक्तपदी
अवैध गुटखा विक्रेत्यांचे धाबे दणाणले; तुकाराम मुंढे अन्न व औषध प्रशासन विभागाच्या आयुक्तपदी
मुंबई | वंदे भारत न्यूज एक्सप्रेस
राज्यातील प्रशासनात धडाकेबाज निर्णय, कडक शिस्त आणि भ्रष्टाचाराविरोधातील आक्रमक भूमिकेमुळे ओळख निर्माण केलेले वरिष्ठ आयएएस अधिकारी तुकाराम मुंढे यांची पुन्हा एकदा महत्त्वाच्या पदावर नियुक्ती करण्यात आली आहे. राज्य शासनाने त्यांची अन्न व औषध प्रशासन (FDA) विभागाच्या आयुक्तपदी नियुक्ती केली असून, या निर्णयामुळे राज्यभरातील अवैध गुटखा विक्रेते, बनावट औषध माफिया आणि नियमबाह्य व्यवसाय करणाऱ्यांमध्ये मोठी खळबळ उडाली आहे.
तुकाराम मुंढे हे महाराष्ट्रातील सर्वसामान्य नागरिकांमध्ये लोकप्रिय असलेले अधिकारी मानले जातात. त्यांनी ज्या-ज्या विभागात काम केले, त्या ठिकाणी भ्रष्टाचार, गैरव्यवहार आणि शिस्तभंगाविरोधात कठोर भूमिका घेतली. त्यामुळे त्यांची प्रतिमा “नो नॉनसेन्स ऑफिसर” अशी निर्माण झाली आहे. आता त्यांच्याकडे अन्न व औषध प्रशासनासारख्या संवेदनशील विभागाची जबाबदारी सोपवण्यात आल्याने या विभागात मोठे बदल होण्याची शक्यता व्यक्त होत आहे.
विशेष म्हणजे, गेल्या काही महिन्यांपासून अन्न व औषध प्रशासन विभाग अनेक कारणांनी चर्चेत होता. राज्यात मोठ्या प्रमाणावर अवैध गुटखा विक्री, बनावट औषधांचे जाळे, अन्नपदार्थांमध्ये भेसळ तसेच काही अधिकाऱ्यांवरील भ्रष्टाचाराच्या आरोपांमुळे या विभागाची प्रतिमा मलिन झाली होती. अनेक ठिकाणी बंदी असतानाही गुटखा विक्री खुलेआम सुरू असल्याच्या तक्रारी सातत्याने समोर येत होत्या. अशा परिस्थितीत शासनाने तुकाराम मुंढे यांच्यावर विश्वास दाखवत विभागाची धुरा त्यांच्या हाती दिली आहे.
मुंढे यांनी यापूर्वी नागपूर महापालिकेचे आयुक्त म्हणून कोरोनाकाळात अत्यंत प्रभावी कामगिरी केली होती. कोविडच्या संकटात त्यांनी कठोर निर्णय घेत शहरातील आरोग्य व्यवस्था सक्षम करण्यासाठी मोठे प्रयत्न केले होते. त्यावेळी त्यांच्या कामकाजाची राज्यभर चर्चा झाली होती. तसेच परिवहन, महापालिका, सार्वजनिक वितरण व्यवस्था, दिव्यांग कल्याण विभाग अशा विविध ठिकाणी त्यांनी पारदर्शक कारभाराचा ठसा उमटवला.
दिव्यांग कल्याण विभागात कार्यरत असताना त्यांनी बोगस दिव्यांग प्रमाणपत्रे आणि अनुदान घोटाळ्यांवर मोठी कारवाई केली होती. अनेक संशयास्पद प्रकरणांची चौकशी सुरू करून त्यांनी गैरप्रकारांना आळा घालण्याचा प्रयत्न केला. त्यामुळे अनेक वर्तुळांमध्ये अस्वस्थता निर्माण झाली होती. त्यांच्या कठोर भूमिकेमुळेच त्यांची वारंवार बदली होत असल्याची चर्चा प्रशासनात कायम असते.
तुकाराम मुंढे यांच्या २१ वर्षांच्या सेवाकाळातील ही तब्बल २५ वी बदली असल्याचे सांगितले जात आहे. विशेष म्हणजे, यापूर्वी त्यांची आपत्ती व्यवस्थापन विभागात नियुक्ती झाली होती; मात्र त्यांना प्रत्यक्ष पदभार मिळण्यापूर्वीच पुन्हा बदली करण्यात आली. त्यामुळे त्यांच्या बदलीची चर्चा पुन्हा एकदा राजकीय आणि प्रशासकीय वर्तुळात रंगू लागली आहे.
दरम्यान, FDA विभागात त्यांच्या नियुक्तीनंतर राज्यभरातील गुटखा माफिया, बनावट औषध उत्पादक आणि नियमांचे उल्लंघन करणाऱ्या व्यापाऱ्यांवर मोठ्या कारवाया होण्याची शक्यता वर्तवली जात आहे. आगामी काळात अन्न सुरक्षा, औषध तपासणी आणि अवैध विक्रीविरोधात विशेष मोहीम राबवली जाऊ शकते, अशी चर्चा प्रशासनात सुरू आहे.
राज्य शासनाच्या या निर्णयानंतर सामान्य नागरिकांमध्ये समाधान व्यक्त होत असून, “आता तरी अवैध गुटखा आणि भेसळीच्या व्यवसायावर लगाम बसेल का?” असा प्रश्न उपस्थित केला जात आहे. तुकाराम मुंढे यांच्या कामाच्या शैलीमुळे FDA विभागात मोठी साफसफाई होणार का, याकडे संपूर्ण राज्याचे लक्ष लागले आहे.
— वंदे भारत न्यूज एक्सप्रेस
