गुरुजींचाही पेपर फुटला; परीक्षा स्थगित
‘नीट’नंतर आता ‘टीईटी’चा गोंधळ!
गुरुजींचाही पेपर फुटला; परीक्षा स्थगित
मुंबई/भिवंडी प्रतिनिधी : राज्यातील शिक्षक पात्रता परीक्षा (टीईटी) प्रश्नपत्रिका फुटल्याच्या धक्कादायक प्रकारामुळे परीक्षा ऐनवेळी स्थगित करण्यात आली आहे. प्रश्नपत्रिका विक्रीसाठी आणल्याच्या संशयावरून पोलिसांनी काही आरोपींना ताब्यात घेतले असून या प्रकरणामुळे लाखो उमेदवारांच्या मेहनतीवर पाणी फिरले आहे.
प्राथमिक माहितीनुसार, दिल्लीहून आलेल्या काही व्यक्तींकडून प्रश्नपत्रिका विक्रीचा प्रयत्न होत असल्याची माहिती पोलिसांना मिळाली होती. त्यानुसार सापळा रचून कारवाई करण्यात आली. तपासादरम्यान काही प्रश्नपत्रिका जप्त करण्यात आल्याची माहिती समोर आली आहे. यामुळे राज्यभरात खळबळ उडाली असून शिक्षण क्षेत्रात संतापाची लाट पसरली आहे.
एसआयटी चौकशीचे आदेश
प्रकरणाचे गांभीर्य लक्षात घेऊन राज्य सरकारने विशेष तपास पथक (एसआयटी) स्थापन करण्याचे निर्देश दिले आहेत. दोषींवर कठोर कारवाई करण्यात येईल, असे शासनाकडून स्पष्ट करण्यात आले आहे.
लाखो उमेदवारांमध्ये नाराजी
टीईटी परीक्षा ही शिक्षक होण्यासाठी महत्त्वाची परीक्षा मानली जाते. परीक्षेच्या तयारीसाठी अनेक महिन्यांपासून अभ्यास करणाऱ्या उमेदवारांना अचानक स्थगितीमुळे मानसिक व आर्थिक फटका बसला आहे. नव्या परीक्षेची तारीख लवकरच जाहीर केली जाणार असल्याचे संकेत मिळत आहेत.
शासनाची भूमिका
शिक्षण विभागाने या प्रकरणाची सखोल चौकशी सुरू असल्याचे सांगितले असून, दोषींना कोणतीही सवलत दिली जाणार नसल्याचे स्पष्ट केले आहे. प्रश्नपत्रिका फुटीमागील संपूर्ण साखळी उघड करण्यासाठी तपास यंत्रणा कामाला लागल्या आहेत.
शासन निर्णय होईपर्यंत परीक्षा लांबणीवर
प्रश्नपत्रिका फुटीच्या प्रकारामुळे राज्यभरातील लाखो उमेदवारांमध्ये संताप व्यक्त होत आहे. शिक्षण विभागाने नव्या तारखेची घोषणा चौकशी अहवालानंतर केली जाईल असे स्पष्ट केले आहे.
“पेपरफुटीची घटना अत्यंत गंभीर आहे. दोषींवर कठोर कारवाई करण्यात येईल आणि संपूर्ण प्रकरणाची निष्पक्ष चौकशी केली जाईल.”
— मुख्यमंत्री देवेंद्र फडणवीस
