वाघोलीत महाराष्ट्र केसरी स्पर्धेचा थरार शिगेला; गादीत जय-हर्षवर्धन, मातीमध्ये महेंद्र-सिकंदर अंतिम फेरीत
वाघोलीत महाराष्ट्र केसरी स्पर्धेचा थरार शिगेला; गादीत जय-हर्षवर्धन, मातीमध्ये महेंद्र-सिकंदर अंतिम फेरीत
वाघोली (पुणे) : Wagholi येथे सुरू असलेल्या ६८ व्या Maharashtra Kesari कुस्ती स्पर्धेतील उपांत्य फेरीचे सामने रंगतदार ठरले. गादी व माती या दोन्ही विभागांतून अंतिम चार मल्ल निश्चित झाले असून ‘महाराष्ट्र केसरी’च्या मानाच्या गदेकरिता आता अंतिम लढतीकडे राज्याचे लक्ष लागले आहे.
‘स्व. अजितदादा पवार क्रीडानगरी’त झालेल्या सामन्यांना कुस्तीप्रेमींची मोठी गर्दी होती. प्रत्येक डावावर टाळ्यांचा कडकडाट आणि जल्लोष अनुभवायला मिळाला.
गादी विभाग : जय पाटीलची दणदणीत एन्ट्री
गादी विभागाच्या उपांत्य फेरीत सोलापूरच्या जय पाटीलने पुण्याच्या पृथ्वीराज मोहोळला पहिल्याच मिनिटाला चितपट करत अंतिम फेरीत धडक मारली. आक्रमक सुरुवात आणि अचूक पकडीमुळे जयने सामना एकतर्फी केला.
दुसऱ्या उपांत्य सामन्यात नाशिकच्या हर्षवर्धन सदगीरने कोल्हापूरच्या पृथ्वीराज पाटीलवर ६-२ अशा फरकाने विजय मिळवला. दोन्ही मल्लांमध्ये चुरशीची झुंज पाहायला मिळाली; मात्र हर्षवर्धनने संयमी खेळ करत गुणांची आघाडी कायम राखली.
माती विभाग : महेंद्रचा दबदबा, सिकंदरची झुंजार खेळी
माती विभागाच्या उपांत्य फेरीत सोलापूरच्या महेंद्र गायकवाडने रविराज चव्हाणवर १०-० असा एकतर्फी विजय मिळवत आपली ताकद दाखवली. महेंद्रच्या आक्रमक डावपेचांपुढे प्रतिस्पर्धी निष्प्रभ ठरला.
दुसऱ्या लढतीत हिंगोलीच्या सिकंदर शेखने अहिल्यानगरच्या सुदर्शन कोतकरवर ४-३ असा निसटता विजय मिळवला. सुरुवातीला ३-० अशी आघाडी घेतलेल्या सुदर्शनवर सिकंदरने शेवटच्या क्षणी पलटवार करत सामना आपल्या बाजूने फिरवला.
सोलापूरचा वरचष्मा
या स्पर्धेत सोलापूरचे दोन मल्ल अंतिम फेरीत पोहोचल्याने जिल्ह्याचा दबदबा अधोरेखित झाला आहे. गादी विभागात जय पाटील विरुद्ध हर्षवर्धन सदगीर, तर माती विभागात महेंद्र गायकवाड विरुद्ध सिकंदर शेख अशी अंतिम लढत रंगणार आहे.
‘महाराष्ट्र केसरी’ची मानाची गदा कोण उंचावणार, याची उत्सुकता शिगेला पोहोचली आहे. कुस्ती शौकिनांचे लक्ष आता अंतिम सामन्याकडे लागले आहे.
